Antikorrupsjon
Helseføretaka har retningslinjer, system og tiltak for å hindre korrupsjon, og for å handtere moglege lovbrot eller tvilstilfelle vi måtte avdekkje.
Ein verksemdskultur basert på gjensidig respekt og open kommunikasjon skaper færre moglegheiter for mislighold. Arbeidsmiljø der nokon kjenner urettferd og urimeleg press kan leie til motivasjon for mislighold. Ein kultur som fremjer varsling utan sanksjonar for varslaren er ein føresetnad for å avdekkje slike handlingar. Den årlege undersøkinga av arbeidsmiljø i helsetenesta kan vere ein del av analysen av risiko for korrupsjon og mislighold.
Antikorrupsjonsprogram
Antikorrupsjonsprogram er ein måte å arbeide systematisk med å hindre korrupsjon og mislighold. Rammeverket for samfunnsansvar foreslår nokre tiltak, slik som å kartleggje risikoområde, ha kontrolltiltak og sørgje for at reglar og retningslinjer er tilstrekkelege og blir følgde.
Dilemmatrening
Enkeltpersonar sin integritet og motstandskraft i møte med dilemma, interessekonfliktar og moglege freistingar kan vere avgjerande for korleis den enkelte handlar i krevjande situasjonar. Etisk medvit blant medarbeidarar og leiarar er viktige førebyggjande element. Alle føretak har etiske retningslinjer. I tillegg kan dilemmatrening vere eit godt og formålstenleg verktøy for å øve opp evna til den enkelte til å vurdere etisk forsvarlegheit.