Å vinne Arbeidsmiljøprisen 2024 må vere perfekt opplading til julebordet, meinte vinnaren
Av dei åtte kandidatane i år var det Kirurgisk og medisinsk poliklinikk i Odda som til slutt stod igjen som vinnar. Gratulerer!
– Har du høyrt det?
Ei oppglødd stemme høyrast i gangen.
– Kva då, svarar ei anna.
– Vi har vunne arbeidsmiljøprisen, kjem det frå den glade stemma.
– Kven?
– Vi, vel. Alle oss.
– Næh!
Ei perfekt opplading til julebord
Denne fredagen skulle det skje noko om ettermiddagen blei det sagt på morgonmøtet. Alle skulle ta turen til møterommet i første høgda klokka halv to.
– I alle fall at det blei marsipankake, seier avdelingsleiar Kari Marie Tjelmeland.
Det er ikkje ein lett jobb å samle flokken ein fredag etter tolv. Men litt etter litt finn mange vegen ned. Etterpå er det mildt sagt god stemning.
– Dette hadde eg aldri trudd, seier sjukepleiar Siv Kolve Brattespe etter utdelinga.
Den oppfatninga deler ho nok med mange av kollegaene sine.
– Ei perfekt opplading til julebordet i kveld, meiner funksjonsleiar Anita Narheim.
Di for vann dei
– Vi har så mange gode søkjarar, men dette var kandidaten som skilte seg ekstra ut i år, forklarar Randi Broch Guddal, føretakshovudverneombod og leiar for Arbeidsmiljøutvalet (AMU).
Skryt fekk dei også av administrerande direktør Anders Hovland og klinikkdirektør John Conrad Brandsø
Arbeidsmiljøprisen er jo ein glimrande moglegheit å skryte litt av seg sjølv. Og det er ein god ting.
– Det er veldig kjekt å lese søknadane om kor bra du og kollegaene dine har det på jobb, og korleis de jobbar systematisk med HMS-arbeidet. Det set vi i AMU stor pris på.
For å vinne ligg det eige kriterium, forklarar Guddal. Særleg har gjengen i Odda skåra godt på følgjande:
- Det kjem tydeleg fram korleis dei arbeider systematisk med HMS-arbeid.
- Poliklinikken har identifisert trivselsfaktorar, både sosiale og organisatoriske.
- Dei har kultur for å lære av kvarandre og deler dette.
- HMS er fast på personalmøta og dei arbeidar stadig med forbetring.
- I søknaden har dei vist til konkrete eksempel på forbetring som er gjennomført.
- Medarbeidarar blir sett og høyrt og det er lagt til rette for ulike grupper.
- Samarbeidet mellom leiar og verneombod fungerer godt og verneombod er inkludert i det systematiske HMS-arbeidet.
