Denne gjengen fekk arbeidsmiljøprisen

Gjengen held til på Raglamyr i Haugesund, og det var også der utdelinga skjedde.

Der blei ein god og uvanleg start på veka for kollegaene. Noko forfjamsa samla dei seg i fellesarealet og fekk utdelt applaus og heider.

– Vi søkt mange gonger, så nå var det vår tur, seier avdelingsleiar Åse Lervik Steine og latteren fylde rommet.

– Nei da, vi er veldig glade for å vinne, og heile avdelinga skal ha æra for å få til dette. Tusen takk.

Rekordmange søkjarar

Alle avdelingar i Helse Fonna kan søke om Arbeidsmiljøprisen. I år var det heile 16 søkjarar.

Arbeidsmiljøutvalet meiner dette syner at mange er nøgde med arbeidsplassen sin. Dei ønskjer å få fram korleis jobbar målretta og systematisk med HMS-arbeid gjennom året.

– Det er veldig positivt at så mange har søkt. Det er eit teikn på at det vert arbeidd godt med arbeidsmiljøet ute i avdelingane, seier leiar av Arbeidsmiljøutvalet, Leif Terje Alvestad.

– Glad og stolt 

Det er administrerande direktør Anders Hovland heilt einig i.

– Eg synst det er utruleg kjekt å sjå at det det blir gjort eit så godt og systematisk arbeid med arbeidsmiljø og HMS i Helse Fonna. Det er eg både glad for og stolt av.

Han fortsett:

– Dette arbeidet skjer i godt samarbeid mellom leiarar, medarbeidarar, tillitsvalde og vernetenesta, og det store talet på søknader viser at det er mange som er nøgde med arbeidsplassen sin i heile verksemda vår.

Kvifor vann Avdeling for helsedata prisen?

AMU trekkjer fram desse punkta som grunngjeving for tildelinga: 

«Avdelinga har ein grundig og gjennomarbeidd søknad. Alle kriteria er svara ut og søknaden syner at avdelinga arbeider veldig godt med systematisk HMS-arbeid. Avdelinga har identifisert mange gode trivselsfaktorar og beskriv det gode arbeidsmiljøet sitt både med sosiale- og organisatoriske faktorar.

 Medarbeidarane brukar kvarandre og delar erfaring og kompetanse. Det gjev bredde og kvalitet i arbeidet. Leiar og verneombod har deltatt på HMS-kurs. Dei har ein plan om å ha årleg gjennomgang av, saman med BHT, tilrettelegging av arbeidsplassen og månadleg internundervisning med tema som er aktuelle for fag og HMS. 

Verneombod deltek i HMS arbeidet og har vore involvert i vurderingar på det fysiske arbeidsmiljøet, arbeidsbelastning og flytting. Avdelinga har nytta BHT både til førebygging og ved oppdukkande behov. Avdelinga har sett HMS-arbeidet i system, og det ser ut til å fungere veldig bra».