Kronisk forstopping hos barn

Etter tømminga startar den verkelege behandlinga; vedlikehaldsbehandlinga. Denne består av ikkje-medisinsk behandling kombinert med avføringsmiddel. Det er svært viktig å jobbe parallelt med ikkje-medisinske tiltak og dessutan å finne rett dose av avføringsmiddel direkte etter tømminga. Dette for å hindre langsamt tilbakefall. Dei to første vekene etter tømminga er avgjerande for det vidare forløpet. Vi tilrår at fastlegen blir involvert og følgjer opp behandlinga med jamne mellomrom. Føresette må sjølv bestille time hos fastlegen for oppfølging.

Det viktigaste i behandlinga er å følgje med sånn at avføringsfrekvens og konsistens er som ønskjeleg. Avføringsmiddel er berre eitt av midlane for å oppnå dette. Dersom barnet held igjen, «ikkje har tid» til å gå på do eller sitje så lenge som det trengst, eller om det er vanskeleg å få i barnet avføringsmiddel, vil det ta lang tid å oppnå ønskt effekt av behandling og kanskje de ikkje får det til i det heile take. Det er vanskeleg å oppnå resultat dersom barnet ikkje forstår konseptet og samarbeider.

Toalettrutinar er det viktigaste tiltaket for å lykkast med behandlinga.

Oftast er det ikkje nok for barnet å gå på toalettet berre når han/ho kjenner avføringstrong. Dette er ein del av problemet, at tømmingsrefleksen er nedsett.

Toalettbesøk etter måltid sjølv om barnet/ungdommen ikkje kjenner avføringstrong. Dette er for å øve opp tarmen til normal funksjon. Barnet/ungdommen bør sitje 4-5 minutt til dømes etter frukost og middag. God sitjestilling er viktig. Barn treng krakk til å ha føtene på.

Barnet må aldri halde igjen ved avføringstrong, men gå på toalettet omgåande.

Barnehage og skule bør få informasjon slik at dei kan gjennomføre toalettrutinane der òg.

Vi tilrår eit normalt fiberinntak. Dersom barnet/ungdommen har eit svært fiberfattig kosthald, bør de auke fiberinnhaldet i maten og unngå fiberfattig mat. Eit fiberrikt kosthald inneber mest mogleg fullkornsprodukt (brød, kornblanding, rundstykke, grov pasta, graut, frukt og grønsaker) og berre unntaksvis fine kornprodukt (loff og andre produkt med lite sammale mjøl, vanleg pasta og ris).

• Vi tilrår eit normalt væskeinntak.
• Drikk maksimum 1-2 glas mjølk dagleg. Mjølk har ein stoppande effekt. Biola eller anna syrna mjølkeprodukt er ikkje stoppande så dei kan de drikke fritt.

Låg fysisk aktivitet hos friske barn og unge er ikkje relaterte til kronisk forstopping. Kraftig nedsett fysisk aktivitet, som ved sjukehusinnlegging kan bidra til forstopping.

Målet med å bruke avføringsmiddel er at det i ein avgrensa tidsperiode vil vere ei hjelp til å halde avføringa blaut.

Dosen ved vedlikehaldsbehandlinga må de bestemme sjølv, i samråd med behandlande lege.

Etter tømming er det avgjerande ikkje å underbehandle. Øyker eventuelt dosen til avføringa blir for tynn flytande, reduser deretter dosen gradvis til avføringa har ønskt konsistens og frekvens. Behandling med avføringsmiddel over lang tid bør berre skje i samråd med lege.

God behandling er oppnådd når: [nedtrekk]

• avføringa er mjuk
• avføringa er homogen (lik i konsistens ved kvar tømming).
• barnet har daglege tømmingar (eller annankvar dag).
• det er rikeleg mengd ved kvar tømming (ca. ein gong dagleg eller annankvar dag).

Ikkje trapp ned dosen når rett dose er funnen, sjå nedanfor. Langsam nedtrapping over fleire månadar.

Prinsippet er at de skal oppnå vedvarande god behandling utan store tilbakefall, i ein samanhengande periode av minimum 2-3 månaders tid. Ofte lengre. I denne perioden skal de ikkje trappe ned medisineringa, og toalettvanar må vere så optimale som mogleg. Deretter skal de trappe ned medisinen i løpet av omtrent like lang tid (cirka 2 månader). Total behandlingstid ofte 3-6 månader, men ofte mykje lengre.