Studiemodellen og ordninga

I Helse Fonna er det planlagt eit årskull på 25 medisinstudentar. Det første kullet skal etter planen starte ved UiB hausten 2026, og kjem då til Helse Fonna hausten 2029.  

Frå hausten 2031 vil det til ei kvar tid vera 75 medisinstudentar tilknytt den nye studiemodellen i Helse Fonna.  

Helse Stavanger er allereie i gong med Vestlandslegestudentar, og Helse Førde vil få 20 studentar til sjukehuset hausten 2028.  

Det vil vere eit nytt, felles studieløp for alle Vestlandslegestudentar, med lokale tilpassingar. 

Gjennom programmet får medisinstudentane moglegheit til praksis, rettleiing og erfaring i lokale helsearbeidsmiljø på Vestlandet.  

Undervisning og praksis

De tre siste åra av studiet vil undervisning og praksis hovudsakleg føregå i Haugesund, med tydeleg fokus på ei klinisk tilnærming og praksisrettleiing. Det vil vere eit nytt, felles studieløp for alle Vestlandslegestudentar. Dette kan avvike noko og bli tilpassa lokale forhold. 

Noko undervisning og praksis vil også blived dei andre sjukehusa i Helse Fonna, ved Haugesund Sanitetsforenings Revmatismesjukehus (HSR) og i primærhelsetenesta. 

Les meir om sjukehusa i Helse Fonna 

Fleircampusmodell

Medisinstudiet skal riggast som ein fleircampusmodell; eitt studieprogram med fleire campusar. Det vil vera rom for ei viss lokal tilpassing, men målsetjinga er at alle studentane, uavhengig av kvar dei studerer, skal ha dei same faga i same semester.

Vestlandslegen blir eit stort prosjekt. Helse Fonna, Helse Stavanger og Helse Førde jobbar nå med å etablere ein felles samarbeidsmodell, saman med UiB.  

Det pedagogiske og akademiske vil i stor grad bli styrt av og utviklast i samarbeid med UiB, og det skal etablerast retningslinjer for utdanningssamarbeid for Vestlandslegen.  

Etablerer lokal prosjektorganisasjon 

Det er mykje som må på plass før vi kan ta imot dei første studentane. Det er derfor etablert ein lokal prosjektorganisasjon som skal gjere Helse Fonna klar til å ta imot dei første studentane.  

Helse Fonna har vedtatt ei betydeleg auke i budsjettet til forskingsavdelinga, og ein stor del av dette vil bli brukt som førebuing til Vestlandslegen. Det vil også bli søkt eksterne midlar som kan bidra til å auke forskingskompetansen innan dei fagområda som skal delta i utdanninga av legar.

Det vil vere behov for å styrke alle fagområda som skal utdanne studentar, og det krev både akademisk, pedagogisk og fagleg kompetanse på høgt nivå. Arbeidet med dette er allereie i gong.

Det vil også bli behov for lokale til undervisning, ferdigheitstrening og kontor både for studentar og medarbeidarar. I tillegg vil det bli behov for studentbustader.   

Prosjekteigar er fagdirektør Andreas Andreassen og prosjektleiar er Finn Arve Åsbu.   

Utviklar universitetspedagogisk kompetanse 

Som ein del av førebuinga til Vestlandslegen har Helse Fonna i 2024 sett i gong med kurset «MEDDID601», innføring i medisinsk- og helsefagleg didaktikk, for sine legar.  

Kurset blir gjennomført i regi av Eininga for Læring ved Det Medisinske Fakultetet/Universitetet i Bergen, og gir ei innføring i universitetspedagogiske prinsipp og verktøy for legane.

Legar med delstilling som lektor ved Universitetet i Bergen, og eit utval av undervisningsansvarlege overlegar, var med i den første gruppa som starta opp hausten 2024.  

Kursinnhald

Kurset omfattar 4 heildagssamlingar, arbeid med ei fordjupingsoppgåve, og framlegging av fordjupingsoppgåva. 

Målet med kurset er å bidra til auka forståing for korleis studentar på bachelor- og masternivå lærer og korleis ein kan leggja til rette for læring for studentar i medisin og andre helserelaterte fag.  

Gjennom teoretiske studiar, diskusjon og praktiske øvingar, gjer kurset deltakarane kjent med sentrale tema og problemstillingar innan det universitetspedagogiske feltet, inkludert læring, undervisningsplanlegging, ulike undervisningsformer, vurdering, digital undervisning, m.m. 

Kurset, som skal gjennomførast på fast basis, blir organisert lokalt i Haugesund  ̶  slik at det er best mogleg tilrettelagt for deltakarane.  

Les meir om Innføring i medisinsk- og helsefaglig didaktikk | UiB

Vestlandslegen er eit program som skal bidra til å byggje eit sterkare og meir berekraftig helsevesen på Vestlandet, ved å skape tettare band mellom medisinstudentar og regionen. 

Styrka rekruttering 

Det er utfordrande å rekruttere legar både til allmennlegetenesta og sjukehusa. Vestlandslegen er eitt av fleire tiltak for å styrke rekrutteringa og auke talet på studieplassar ved medisinstudiet i Noreg og på Vestlandet.  

Ved å utdanne lokalt, vil det vere meir sannsynleg at studentane blir verande etter utdanninga. Dette vil leggje til rette for ei meir berekraftig rekruttering for Helse Fonna og for kommunane.  

Samstundes vil Vestlandslegen gjere Fonna-sjukehusa og regionen vår meir attraktiv som arbeidsstad, og dermed leggje til rette for betre ressurstilgang. Vestlandslegen vil også vere viktig for kompetansebygging innan helsefaga. 

Lokalt og regionalt samarbeid 

Prosjektet vil også påverke andre enn Helse Fonna. Samarbeid med kommunane blir viktig for å sikre den delen av utdanninga som skal føregå i primærhelsetenesta.  

Nokre av fagområda vil også involvere Haugesund Sanitetsforenings Revmatisme­sjukehus (HSR). Dei vil derfor vere ein del av prosjektorganisasjonen.  

Det blir også etablert eit tett samarbeid med Høgskulen på Vestlandet, både med tanke på undervisningslokale og kompetansebygging. 

Prosjektet vil også etablere eit samarbeid med næringslivet i regionen.