Legar i spesialisering (LIS 1)

Stillingane blir lyst ut på Helsedirektoratet sine nettsider  

HR ved avdeling for utdanning og kompetanse gjennomfører rekrutteringsprosessen i samarbeid med aktuelle ressursar frå klinikkane.

Helse Fonna har dei siste åra hatt rundt 350 søkjarar til kvart opptak. Alle søknader blir lest og eit utval blir innkalla til intervju. Intervju blir gjennomført enten ved fysisk frammøte, eller via Skype/telefon.

Det er Helsedirektoratet sine fristar som gjeld ved utsending av tilbod om stilling. 

Helse Fonna tilbyr både todelt (medisin og kirurgi) og tredelt teneste (medisin, kirurgi, psykiatri).

Arbeidsavtale til LIS 1 er utforma etter gjeldande avtalar mellom Legeforeningen og arbeidsgivarforeninga Spekter. 

Frå våren 2025 tilbyr vi i tillegg ei ny tredeling av teneste ved Haugesund sjukehus: medisin, kirurgi, nevrologi eller medisin, kirurgi, pediatri.

Frå oss kan du forvente at du får ein rettleiar som bidrar til at du opplever god fagleg og personleg utvikling. Vi har ein overlege tilsett i deltidsstilling i HR som har det faglege ansvaret for LIS 1-ordninga i Helse Fonna.

Vi ønskjer at du skal få ei god oppleving som LIS 1 hos oss, og at du skal oppnå dei planlagde læringsmåla for ditt utdanningsløp i spesialisthelsetenesta.  

Tenesta i Helse Fonna startar med eit seksdagars introduksjonsprogram. Dei første dagane er eit felles program som blir halde ved Haugesund sjukehus.

Dei resterande dagane blir avvikla lokalt på sjukehusa (Haugesund, Stord og Odda). Desse dagane skal førebu deg til tenesta.  

LIS1-tenesta er i hovudsak i akuttmottaket og på dei kliniske avdelingane. I akuttmottaket vil LIS1 ta i mot pasientar, vurdere initial diagnostikk og vidare behandling ved rett avdeling.

Dette blir gjort under rettleiing av ein lege i spesialisering (LIS 2 og/eller 3). I avdelinga deltar LIS1 i den daglege drifta med innkomst av elektive pasientar, legevisitt og utskrivingar av pasientar.  

Kompetanseportalen er nytta som dokumentasjonsverktøy gjennom heile spesialiseringsløpet. 

Helse Fonna kan hjelpe med å skaffa bustad. Dei som har behov for dette, kan etter tilsetting er gjort, ta kontakt med Fonnatorget på e-post fonnatorget@helse-fonna.no.