Unik og effektiv behandling av depresjon

Helse Fonna utvidar tilbodet om behandling for depresjon, og har no oppretta eit nytt behandlingstilbod for dette, transkraniell magnetisk stimulering (TMS). Behandlinga er for pasientar med mild til moderat depresjon, og studiar viser til gode resultat.

– Mange opplever depresjon ein gong i livet, noko som er vanskeleg for den som blir råka, men også dei rundt. Vi har jobba lenge med å få denne maskinen på plass, og er veldig godt nøgde med at tilbodet endeleg er på plass. På denne måten håpar vi å kunne hjelpe mange pasientar, fortel spesialsjukepleiar Elisabeth Aarvik, som jobbar med biologiske behandlingsformer ved Klinikk for psykisk helsevern.

Avdelinga har i mange år gitt ECT-behandling (elektrokonvulsiv terapi) for behandling av alvorleg depresjon, der anna behandling ikkje har gjeve resultat. ECT gir ein låg dose straum under narkose, og blei tidlegare omtalt som «elektrosjokkbehandling».

Kan leve som normalt

TMS-behandling er likestilt med medisinar og samtaleterapi, og metoden er svært effektiv. Sjølve behandlinga tek berre tre minutt, men pasientane må innom dagleg, fem dagar i veka, i seks veker.

For å få tilbodet må pasientane bli tilviste frå fastlege eller andre spesialistar, og så må dei kartleggjast.

– Fordelen med at det berre tek tre minutt er at pasienten kan gå på jobb eller skule som normalt, og køyre bil til og frå. Vi har til og med eigne parkeringsplassar, seier psykiatrisk sjukepleiar Kathrin Bjånes.

I starten har teamet, som består av tre spesialsjukepleiarar og ein overlege, kapasitet til å behandle 4 pasientar om gongen, men på sikt håpar dei å kunne doble talet.

Berre fem i landet

Helse Fonna og Haugesund sjukehus er eitt av berre fem sjukehus i landet som tilbyr slik behandling, men i Sverige har dette vore vanleg i 25 år. Det er også her spesialsjukepleiarane har fått opplæringa si.

– Behandlinga skal normalisere område i hjernen som er ute av balanse. Det er heilt ufarleg, for stimuleringa er veldig svak, understrekar Aarvik, og viser til at halvparten av pasientane får god effekt av behandlinga, blant anna i form av betre søvnkvalitet, betring i depressive symptom og auka aktivitetsnivå.

– Mange ventar ofte for lenge før dei søkjer hjelp, og ikkje alle har effekt av samtaleterapi og medisinar. Dette er eit supplement til det, legg Bjånes til.

Behandlinga er for personar over 18 år, og har vist best resultat på yngre pasientar.