Habilitering - Arvelige nevromuskulære sykdommer

Før du møter til utgreiing hos oss er det fint om du tenker gjennom kva utfordringar du har i kvardagen, og korleis dette har utvikla seg over tid. Dette kan for eksempel vere om du strevar med:

• rørsle/motorikk og flytting
• aktivitetane til dagleglivet – slik som å ete og å kle på deg
• pust
• søvn
• arbeid
• fritidsaktivitetar

Informasjon om korleis dette har utvikla seg er viktig for utgreiinga. Vi ønsker derfor at ein som kjenner deg godt blir med deg til avtalen. Vi vil også stille deg spørsmål om sjukdommar og tidlegare sjukehusopphald.

Om du bruker hjelpemiddel jamleg, er det fint om du kan ta dei med deg. Dette kan for eksempel vere hjelpemiddel til flytting, ortosar eller kommunikasjon.

Møte med avdeling for nevrohabilitering skjer som regel på sjukehuset.

Møtet startar med at vi gir deg informasjon om kva som skal skje og kven du møter. Som regel vil du møte lege og/eller fysioterapeut. Av og til er det behov for hjelp frå psykolog, ernæringsfysiolog eller fagkonsulent.

Utgreiinga er sett saman av samtalar, observasjonar og undersøkingar. Undersøkingar kan innebere at du må kle av deg.

I løpet av utgreiinga kan det bli behov for å gjennomføre undersøkingar ved andre avdelingar i sjukehuset. Vi tilviser deg i så fall vidare.

Du får informasjon om resultata av utgreiinga.

Ofte er det behov for eit langvarig behandlingsforløp i spesialisthelsetenesta, men nokon blir også tilviste med ei avgrensa problemstilling. Når denne er utgreidd og behandling er starta, kan oppfølginga her avsluttast. Det er kommunen eller bydelen du bur i som har ansvar for vidare tiltak og tilrettelegging. Behovet for oppfølging lokalt blir vurdert i samråd med deg og dei som har ansvar for tilbodet i kommunen/bydelen.

Vi utarbeider ein skriftleg rapport med informasjon om det som er gjort hos oss og oppfordringar vidare. Om det er behov for vidare oppfølging frå avdeling for nevrohabilitering, står det i rapporten. Den blir send både til deg og den som har vist deg til utgreiinga.