ECT (elektrokonvulsiv behandling eller elektrostimulering)
ECT er eit viktig behandlingsalternativ for pasientar med alvorleg depresjon, og blir brukt i tilfelle der medikament eller andre behandlingar ikkje har hatt effekt. I visse tilstandar kan ECT vere livreddande behandling. ECT er ein behandlingsmetode der det blir gitt ei kontrollert mengde straum til hovudet. Det utløyser eit kortvarig krampeanfall.
Korleis verkar behandlinga?
Behandlinga blir gitt til innlagde pasientar som ein serie av 6-15 behandlingar. I nokre tilfelle treng ein vedlikehaldsbehandling i månadene etterpå. Slik behandling blir tilpassa individuelt, men blir ofte gitt kvar tredje veke. Behandlinga blir utført i narkose og under muskelrelaksasjon (muskelavslapping).
Har behandlinga biverknadar?
Metoden har vore brukt i over 70 år, og blir i dag brukt ved mange norske sjukehus. ECT er ein trygg og skånsam behandling med minnevaksar som den største biverknaden. Dette normaliserer seg hos dei fleste innan 1-3 månader. I tillegg kan pasientane oppleve hovudverk, kvalme, muskelsmerter og forvirring. Ein sjeldan gong kan nokre få tannskadar. Dette gjeld spesielt dei som har svekka tenner.
Behandlingsdagen
Pasienten skal faste før ECT. Det vil seie at ein ikkje skal ete, røyke eller tygge tyggegummi/drops frå midnatt kvelden før. Når du kjem til behandling vil ECT sjukepleiar feste elektrodar med små tynne leidningar på brystet og på hovudet ditt. Det er for å registrere hjartefrekvensen og elektriske aktivitet i hjernen under behandling. Det vil også bli målt blodtrykk og oksygennivå i blodet ditt. Du får oksygen gjennom ei maske både under og etter behandlinga.
Anestesisjukepleiaren legg ei nål forsiktig under huda di. Gjennom den får du narkosemedisinar. Medisinane verkar raskt når dei blir gitt gjennom ei slik kanyle. Når medisinane er gitt vil du sovne raskt. Mens du søv gir ECT operatøren deg ein liten mengde straum gjennom hovudet ditt. Det utløyser lette kramper/rykningar gjennom kroppen. Du vil ikkje kjenne straumstøyten eller krampene.
Narkosen er kortvarig. Du vaknar etter berre nokre minutt. Du får så anledning til å kome deg og vakne ordentleg på overvakingsavdelinga. ECT personalet vil hente deg før du blir med til kontoret vårt for å ete frukost før du returnerer til avdelinga du tilhøyrer. Polikliniske pasientar returnerer til heimen. Blir du behandla poliklinisk må nokon køyre og hente deg. Du skal ikkje vere aleine 24 timar etter behandlinga. Du skal ikkje køyre bil sjølve behandlingsdagen. Vanlegvis blir bilkøyring fraråda under ein behandlingsserie.
Kontaktinformasjon
Funksjonsleiar Elisabeth Aarvik – telefon: 481 85 038
Psykiatrisk sjukepleiar Kathrin Bjånes - telefon: 481 82 366
Spesialsjukepleiar Keth Kihle-Solberg – telefon: 418 63 793
Lokasjon/oppmøteinfo
Biologiske behandlingsformer held til i 2. etasje på Haugesund sjukehus. Ta heisen opp og følg skilting til ECT/TMS poliklinikk.
Opningstider (telefontider)
Våre opningstider (telefontider) er måndag-fredag kl. 08.00-15.30
Førebuing før behandling
Pasientar som kjem til ECT må vere fastande, og ha vaska håret kvelden før. Håret må vere tørt. Pasienten må ikkje bruke ansiktskrem. Teamet vil ta kontakt med deg dersom det er behov for anna førebuing før timen.