Nyføddintensiv

• Kva kan du forvente når barnet ditt er fødd i veke 28-32
• Kva kan du fovente når barnet ditt er fødd i veke 33-35

Avdelinga vår er bygd rundt prinsippa om familiebasert nyføddomsorg og kenguruomsorg. Vi vil tilretteleggje slik at de kan vere mest mogleg saman frå barnet blir fødd til de reiser heim.

Kva er kenguruomsorg?

Kenguruomsorg betyr at de som foreldre har barnet tett inntil dykk, hud mot hud, så tidleg som mogleg etter fødselen. Forskning viser at direkte hudkontakt med foreldra er det beste for premature eller sjuke nyfødde barn. Dette har mange fordelar for barnet, og tilpassinga til livet utanfor livmora blir enklare.

Foreldra sin nærver er med på å påverke barnets søvn, velvære, tryggleik, vektoppgang, og kroppstemperaturen blir meir stabil. Det stimulerer også barnet til å suge.

Foreldra sin favn blir ein naturleg forlenging av svangerskapet. Barnet kan høyre den kjente stemma og kjenne seg trygg. Dei fleste foreldra føler seg også tryggast når dei kan vere nært barnet sitt, og det gir nærheit og tryggleik. Dei positive kjenslene for barnet styrkjer seg. Nærheita gjer det lettare å forstå barnets signal og behov, som når barnet vil die. Hudkontakten mellom mor og barn aukar også mjølkeproduksjonen.

Kenguruomsorg blir rekna som ein del av behandlinga for barnet, og vi ønsker at de fører oversikt over kor mange timar per døgn barnet er hud-mot-hud.

Dette skjer på eit eige skjema. Personalet vil vise korleis de fyller det ut.

Korleis gjer vi det?

Barnet ligg nakent, berre med ei bleie på, hud-mot-hud med dykk så mykje som mogleg gjennom døgnet. Barnet blir plassert i stilling kalla kenguruposisjon. Barnet blir plassert vertikalt på mors eller fars bryst, hud mot hud. Armar og bein er bøyde, som i froskestilling, og hovudet er venta til sida utan at nakken strekkjer seg. Barnets brystbein er i høgde med foreldra sitt brystbein.

Personalet vil hjelpe dykk med planlegging, gjennomføring og støtte ut frå barnet sine behov og forutsetningar.

Det er viktig med god døgnrytme både for foreldre og barnet. Vi ønsker at de har stått opp og er klar for dagen før kl. 09. Da startar dei daglege rutinane og vi gjer oss klar for legevisitt.

Vaktskifte: kl. 7:30-08:00

Legevisitt: kl. 9:30 og utover (kan variere)

Stilletime: kl. 13-14 (ansatte har rapport/fag)

Vaktskifte: kl. 14:30-15:00

Vaktskifte: kl. 22:00 – 22:30

Stilletime

Personalet har rapport/fag kvar dag kl. 13-14. Vi ønskjer at så mange av personalet som mogleg får delta på dette. Difor er det fint om du er saman med barnet ditt i denne perioden. Vi vil vere tilgjengeleg ved behov.

For tidleg fødde barn og sjuke nyfødde er ekstra sårbare for smittsame sjukdommar. God hygiene er difor viktig. I sjukehusmiljøet er det fleire og meir motstandsdyktige bakteriar enn heime hos dykk sjølve. Nokre bakteriar er meir aggressive og kan føre til alvorlege infeksjonar.

Les meir om våre hygienereglar

Dei fleste barna får mat 7-8 gonger i døgnet, men det kan vere forskjellar. Tidene kan variere og blir avtalt med den som passar barnet.

Vi vil legge tilrette for at mor og barn skal få etablere gode ammerutinar så tidleg som mogleg.

I tillegg til amming vil det i starten vere aktuelt å gi barnet mat med kopp eller sonde, til barnet klarer å spise sjølv.

Barn med fødselsvekt under 2500 gram før tilskot av vitaminar og jern.

Begge foreldre har rett til å få mat medan barnet er innlagd på nyføddintensiv.

Foreldre kan bruke kantina i 3. etasje ved barneavdelinga. Her blir det servert frukost, lunsj og middag.

Sen kveldsmat blir sett i kjøleskapet på tekjøkkenet utanfor foreldreromma samstundes som kveldsmat blir servert i kantina.

Middag

Vi bestiller middag kvar dag etter kor mange som skal ha middag. De har sjølve ansvar for å skrive dykk opp på tavla som heng på veggen i gangen inn til avdelinga kvar dag.

Kvar morgon rundt kl. 09 bestiller vi middag og stryk deretter ut middagsbestillinga slik at de kan skrive dykk på for neste dag. Det vert hengt opp middagsliste kvar søndag slik at de kan sjå kva som er til middag.

Tekjøkken

Det er eit lite tekjøkken utanfor familierom 6. Her er det mikrobølgeomn, kaffemaskin, kjøleskap og oppvaskmaskin. De kan bruke tekjøkkenet fritt, men de må halde orden, då det ikkje er kjøkkenpersonale som tek seg av det rommet.

Brukar de oppvaskmaskinen må de sørgje for å sette den på, og ta ut av reint kjørel etterpå. Fat, glas, bestikk o.l. skal alltid takast med tilbake til kantina.

Kantine i 3. etasje

Opningstider:

• Frukost: kl. 08.00 – 09.30
• Lunsj: kl. 11.30 – 13.00
• Middag: kl. 14.15 – 15.45
• Kvelds: kl. 18.30 – 19.30

Kantine i 6. etasje

Ved bruk av kantine i 6. etasje, må de betale sjølve.

Opningstider:

• Kvardagar: kl. 09.30 – 15.15
• Helg og heilagdagar: Stengt

Narvesen kiosk i 1. etasje

Opningstider:

• Kvardagar: kl. 06.30 – 21.00
• Laurdag: 09.00 – 21.00
• Søndag: 10.00 – 21.00

Nyføddintensiv har mykje teknisk utstyr. Det kan vere skremmande for foreldre og besøkande å sjå barn med slangar og leidningar festa til kroppen, og å høyre apparat som stadig alarmerer.

Utstyret er likevel gode hjelpemiddel for oss i overvaking og behandling av barna. Det gir oss viktig informasjon om barnet sin tilstand, slik at vi til ei kvar tid kan observere endringar og setje i verk tiltak.

Vi har 6 kuvøserom på avdelinga. Hovudsakleg har vi eitt barn på kvart rom, men dersom det er mange barn innlagt må romma delast opp.

Besøksregler og -tider

Besøk skal alltid avtalast med sjukepleiar på førehand og skal helst skje mellom kl. 17:00 og 18:30.

Ikkje kom viss du er sjuk

Mange av barna som ligg her er veldig utsette for infeksjonar. For å redusere infeksjonsfaren må alle som besøker barnet vere friske. Det vil seie at ein ikkje har infeksjonssjukdomar, forkjøling, influensa eller oppkast/diaré. Foreldre/besøkande med herpes munnsår skal ikkje opphalde seg på avdelinga. Det bør startast antiviral behandling og såret bør vere tørt før ein kjem inn på avdelinga igjen.

Ikkje ver lenge

Besøkande utanom foreldre og søsken skal berre opphalde seg kort tid inne hos barnet. Lengre besøk etter avtale. Samstundes ber vi om at de berre tek med to besøkjande om gongen. Dette av omsyn til dei små barna som treng ro. Yttertøy må takast av før de kjem inn på avdelinga. Vi har garderobe i gangen med skap som de kan låne hengelås til.

Barn under 7 år

Vi tillèt ikkje besøk av barn som ikkje er søsken. Dersom søsken er under 7 år, må du avtale med sjukepleiar før dei får komme på besøk. De bør førebu søsken på kva som vil møte dei på avdelinga før dei kjem, slik at dei veit kva som ventar dei.

Lyd og lukt

Hugs at de går inn på barna sitt soverom. Ver venleg og snakk med dempa stemme. Lyd er mykje sansestimuli for barnet, og kan vere belastande. Vi ber om at besøkjande vel duftsvake produkt, då sterke lukter òg kan vere belastande for barnet.

Gratulerer med barnebarnet!

Som besteforeldre kan ein oppleve at gleda over barnebarnet blir blanda med bekymringar for barnets helse og korleis dottera eller sonen din opplever å ha eit for tidleg fødd eller sjukt barn.

Vi har samla nokre råd til kva du som besteforelder kan gjere for både barn og barnebarn, sjå Heimeoppfølging av nyfødde - Helse Fonna HF

Reiser du til eller frå offentleg godkjent behandling, kan du ha rett på å få dekt nødvendige utgifter til reise.

Pasientreiser koordinerer transport av pasientar til og frå behandling på sjukehuset.

Kontakt pasientreiser på telefon 05515 eller gå til Pasientreiser - Helse Fonna HF

Du kan ha rett til pleiepengar dersom:

• Du er medlem av folketrygda. Bur du i Noreg, er du vanlegvis medlem av folketrygda (nav.no).
• Du har omsorg for barnet i perioden du søkjer for.
• Barnet har vore til behandling/utgreiing på sjukehus eller annan spesialisthelseteneste.
• Du er saman med barnet medan det er innlagt, eller du er heime fordi barnet treng pleie heile tida.
• Du har vore i jobb i minst 4 veker umiddelbart før pleiepengeperioden startar (sjå informasjon om unntak frå dette litt lenger nede på sida).
• Du har minst 20 prosent fråvær frå arbeidstida di.
• Inntekta di svarer til minst halvparten av grunnbeløpet (nav.no) i folketrygda.

Fleire omsorgspersonar

To omsorgspersonar kan søkje pleiepengar samtidig. Når eit barn er innlagd på sjukehus, har begge foreldra som hovudregel rett til pleiepengar. Begge foreldra må i så fall vere til stades for barnet på sjukehuset. Det same gjeld dersom barnet har oppfølging frå den ambulerande sjukepleietenesta (NAST) til Nyføddavdelinga heime.

Legevurdering

Legen vurderer om det vil vere behov for oppfølging frå éin eller to omsorgspersonar i perioden på sjukehus og heime.

For å ha rett til pleiepengar må du ha omsorg for barnet (det vil seie at barnet bur fast hos deg).

Også andre omsorgspersonar enn foreldra kan ha rett til pleiepengar dersom dei heilt eller delvis har omsorg for barnet. Dette kan til dømes vere besteforeldre, tante eller onkel, vaksne søsken, andre familiemedlemmer eller andre nærståande.

Kva kan du få dekka?

Pleiepengane blir rekna på same måte som sjukepengar (nav.no). Berekningsgrunnlaget blir fastsett ut frå dokumentert inntekt på det tidspunktet du søkjer pleiepengar frå.

Inntekt opptil 6 gonger grunnbeløpet i folketrygda (nav.no) blir tatt med i berekningsgrunnlaget. Du får pleiepengar for 5 dagar i veka, men ikkje for laurdag og søndag. Arbeidsgjevaren din kan forskottere pleiepengar og krevje refusjon frå NAV.

Kva skjer vidare?

Lege på sjukehuset fyller ut skjemaet som du får tilgang til via Helsenorge – din helse på nett - Helsenorge. Følg instruksjonane du får der, så vil prosessen gå som planlagd.

Søknadsfrist

NAV kan gi pleiepengar for opptil 3 månader før den månaden du søkte. Søker du til dømes om pleiepengar for juni, må NAV ha søknaden seinast i september.

Les utfyllande informasjon om pleiepengar på www.nav.no, eller ring NAV på telefon 55 55 33 33.

Foreldre har rett til all informasjon om sitt eige barn. Personalet har tausheitsplikt og kan ikkje svare på spørsmål om andre barn. Vi kan heller ikkje svare på telefonar frå familie og venner utan samtykke frå barnets foreldre.

Gi oss beskjed dersom nokon skal besøke barnet ditt utan at du er til stades.

Du har elektronisk tilgang til barnet sitt journal via Helsenorge.