Vi tilrår at du alltid nyttar siste versjon av nettlesaren din.
logo Helse Fonna

Pusteprøve

Spirometri

Spirometri er ei undersøking som måler lungefunksjonen din – både kor mykje luft du får til å puste ut totalt (FVC), og kor raskt du får til å puste ut lufta (FEV1 og PEF).

Før

Vi måler høgda og vekta di før undersøkinga.

Nødvendige førebuingar

For at testen skal gi riktigast mogleg resultat er det viktig at du gjer nokre førebuingar:

  • Unngå å ete eit større måltid den siste timen før undersøkinga
  • Unngå å bruke tobakk undersøkingsdagen
  • Ikkje anstreng deg den siste timen før undersøkinga

Inhalasjonsmedisin

  • Om mogleg, bør du unngå å ta luftvegsopnande inhalasjonsmedisin 6–48 timar før undersøkinga, avhengig av type inhalasjonsmedisin.
  • Dersom du kjenner deg dårleg, kan du likevel ta luftvegsopnande inhalasjonsmedisinar. I så fall er det viktig at du noterer ned tidspunktet du tok medisinen.
  • Om du bruker inhalasjonssteroid, kan du ta dei som vanleg, med mindre du har fått beskjed om noko anna.

Andre medisinar

  • Alle andre faste medisinar skal  du ta som vanleg.
  • Nokon medisinar kan påverke resultatet av pusteprøva. Derfor bør du alltid på førehand opplyse kva medisinar du bruker.

Du vil få informasjon om alt dette frå helsepersonell før undersøkinga.

Under

Under undersøkinga skal du sitte på ein stol. Du får på ei naseklemme og skal deretter puste gjennom eit røyr, så mykje og så fort du kan. Dette skal du gjere fleire gonger. Ein sjukepleiar vil heile tida forklare kva du skal gjere.

Undersøkinga er smertefri, men kan opplevast litt ubehageleg. Den kan vere slitsam, og du kan bli svimmel og få litt hoste.

Spirometri med reversibilitetstest

Om du er tungpusta, og spesielt om testen er unormal, kan vi ta ein ny test for å sjå om pusten blir forbetra etter at du har fått luftvegsutvidande medisinar. Dette blir gjort for å teste verknaden på medisinen på kvar enkelt.

Etter

Når pusteprøva er gjennomført fleire gonger, har vi fått tilstrekkeleg informasjon om lungefunksjonen din. Lege vil sjå over og snakke med deg om resultatet av undersøkinga.

Kontakt

Haugesund sjukehus Lungepoliklinikk, Haugesund sjukehus

Kontakt Lungepoliklinikk, Haugesund sjukehus

Oppmøtestad

Vi har felles ekspedisjonsluke med hjertepoliklinikken i 2. etasje. Dersom du tar heisen ved resepsjonen i 1. etasje, finn du luka vår i korridoren til høgre når du kjem ut av heisen.
En høy vinkel av en bygning

Haugesund sjukehus

Karmsundgata 120, 5528 Haugesund

Finn fram

Transport

Det er fleire busstopp like ved og i nærleiken av Haugesund sjukehus.

www.kystbussen.no - Ruteinformasjon for Kystbussen (Bergen-Stord-Haugesund-Stavanger)

www.kolumbus.no - Ruteinformasjon om lokalbussar i Rogaland

Praktisk informasjon

Parkeringshuset nord for sjukehuset er reservert pasientar og besøkande. Alle må betale for parkering. Dette gjer du på p-automatane enten med kort eller kontanter. I tillegg kan du benytte EasyPark appen.

Parkeringshuset har tre ladeuttak.

Reserverte parkeringsplassar

Reserverte plassar for HC-parkering er utanfor hovudinngangen. Hugs å legge parkeringsbeviset godt synleg i frontruta.

Det er reserverte plassar for blodgivarar og dialysepasientar på toppen av parkeringshus. Du vil få utlevert parkeringsbevis frå avdelingen dersom du har rett til å bruke dessa plassane.

Parkeringsavgift

Det er Haugesund Parkering Drift as som har oppfølging av parkeringshuset og parkeringane foran hovudinngangen. Eventuelle klager på p-avgift meldast til dei. Dette finn du også informasjon om på  p-automatane. 

Pris for å parkere på sjukehus i Helse Fonna er 25 kroner i timen. Makspris for eit døgn er 155 kroner.​

Parkering i Haugesund sentrum

Sjå P-kart - Haugesund Parkering

 

Du kan endre timen din inntil 48 timar før oppmøte. Dette kan du gjere på helsenorge.no eller ved å kontakte oss på telefon 52 73 90 00. Kontaktsenteret vårt er opent kl. 07.30 – 15.30.

På helsenorge.no finner du informasjon om timen din i innkallingsbrevet.

Apoteket ligg i første etasje, like bak resepsjonen.

Opningstider:

Måndag-fredag kl. 08.00-16.30.

Mange pasientar og pårørande ønskjer å ta bilete eller video som eit minne frå tida på sjukehuset. Dette er sjølvsagt heilt greit, så lenge det er pasienten eller pårørande og vener det blir teke bilete av.
 
Det er ikkje lov å ta bilete av medpasientar eller tilsett ved sjukehusa. Vi har hatt fleire saker der bilete av medpasientar og tilsette har blitt publiserte på sosiale medium utan at dei har gjeve løyve om det. 

Vi håpar at du syner respekt for personvernet til alle du møter under opphaldet ved sjukehuset, og at du bare tar bilete av eigen familie og vener.​

​Kantina i  6.etasje er open for tilsette, pasientar og besøkande.

Opningstider:
Måndag - fredag kl. 09.30-15.30. Stengt helger og heilagdagar.

Pasientkantine i 4-og 5.etasje er kun open for pasientar.

Fleire av sengepostane har eigne spiserom med enkel sjølvbetening for inneliggande pasientar. Ta kontakt med di avdeling.

Det ligg ein Narvesen kiosk i 1.etasje

Opningstider:
Måndag - fredag kl. 06.30-21.00
Laurdag: 9.00-20.00
Søndag: 10.00-20.00 




​​​​​​​​​Ta med den faste medisinen du brukar. Det kan ta tid å få same medisin frå apoteket.

Dessverre kan tjuveri finne stad på sjukehuset. La ​verdisaker vere igjen heime.

Ta med behagelege klede og gode innesko som er stødige og lette å ta på. Av hygieniske grunnar er det ikkje tillate å gå barbeint på sjukehuset.

Ta med toalettsaker som tannbørste, tannkrem, kam, deodorant og eventuelt barbermaskin. ​Hugs også hjelpemiddel du er avhengig av: til dømes stokk, ​krykker, rullator og rullestol.

God hygiene er ein viktig faktor for å kunne gi god behandling til pasientane.