Gastroskopi med innlegging av stent i matrøyr eller tolvfingertarm
Eit gastroskop er eit bøyeleg instrument som er cirka 9 mm tjukt med kamera på tuppen som overfører bilete til ein skjerm. Gastroskopet blir ført inn gjennom munnen og ned i matrøyr, magesekk og tolvfingertarm. Ved gastroskopi kan vi undersøkje om det er sjukdom i matrøyr, magesekk eller tolvfingertarm. Ved forsnevring av matrøyr eller tolvfingertarm kan vi ved hjelp av gastroskopet leggje inn ein stent.
Årsaka til og føremålet med stent
Ein stent er eit røyr, vanlegvis utforma som eit nett i metall eller kunststoff. Stenten blir ført inn i det forsnevra området og blir aktivert slik at han utvidar seg. Det er ulike årsaker til at det kan vere trongt. Det kan vere grunna arrvev som har oppstått etter kirurgi, betennelse, eller på grunn av svulstar.
Formålet med plasseringa av stenten er å utvide innsnevringa og dermed auke plassforholda.
Før
Du må møte fastande, magesekken må vere heilt tom før undersøkinga.
- Ikkje ete eller drikke noko dei siste seks timane før undersøkinga
- Er du veldig tørste kan du drikke eitt til to glas vatn inntil to timar før undersøkinga. Etter dette kan du skylje munnen utan å svelgje noko.
Blodfortynnande medisinar
Bruker du blodfortynnande medisinar er det risiko for at det kan oppstå større blødingar enn normalt. Derfor er det ønskjeleg at du mellombels sluttar med blodfortynnande medisinar.
Les innkallingsbrevet eller meir informasjon på denne sida for å sjå kva for nokre blodfortynnande medisinar du må slutte med, og kor lang tid før undersøkinga du må gjere dette:
Har du diabetes og bruker insulin eller tek livsviktige medisinar som ikkje kan utsetjast, kan du kontakte oss for å få timeavtale tidleg på dagen. Gi oss beskjed om du er allergisk for nokre medikament.
Om du bruker faste medisinar, ta med ei oppdatert medisinliste til undersøkinga.
Under
Under sjølve undersøkinga ligg du på venstre side. Har du tannprotesar, må desse takast ut. Du får eit munnstykke mellom tennene. Du kan puste normalt gjennom nase og munn under heile undersøkinga. Når gastroskopet blir ført inn i munnen får du beskjed om å svelgje. Sjølv om dette blir opplevd ubehageleg, er det viktig å slappe av og puste roleg under undersøkinga. Du vil på førehand og under behandlinga få smertestillande og roande medisinar.
Utblokkinga skjer ved at ein bruker spesielle blokkestavar i ulik storleik. Desse blir førte over ei rettesnor, og ein vil gradvis utvide det tronge området ved å gå opp i storleik på blokkestavane. Ein kan også bruke ein ballong som ein stegvis fyller med vatn, då vil trykkauken utvide det tronge området. Av og til bruker ein røntgengjennomlysing for å kontrollere blokkinga undervegs.
Gjer det vondt?
Det kan opplevast ubehageleg og vere litt smertefullt under blokkinga. Du vil få smertestillande medikament undervegs.
Kor lenge varer behandlinga/undersøkinga?
Sjølve undersøkinga tek vanlegvis mellom 30 og 45 minutt.
Etter
Kva skjer etterpå?
Vanlegvis må du vere tre til fire timar til observasjon etter avslutta undersøking. Dei første to timane skal du liggje flatt i senga slik at stenten får festa seg. Du kan ikkje ete eller drikke dei to første timane etter undersøkinga.
Dersom undersøkinga er gjord ved dagkirurgi, kan du reise heim etter nokre timar. Du kan ikkje sjølv køyre bil same dag, då det blir gitt roande og smertestillande medisinar under undersøkinga.
Etter at stenten er plassert, tek det to til tre dagar før han er utvida til maksimal storleik. I denne perioden er det vanleg å vere litt uvel og ha noko smerter i mage- og brystregionen.
Den første dagen tilrår vi at du berre et flytande kost. Dagen etter behandlinga kan du prøve deg fram med mosa mat.
Det er viktig å drikke godt i samband med måltida. Du må sitje oppreist under måltida og ei stund etter at du har ete. Der stenten ligg er det ikkje normal skyverørsle av maten. Du bør tyggje godt og unngå store matbitar som kan tette stenten.
Om stenten blir plassert gjennom lukkemuskelen mellom matrøyr og magesekk, skal du bruke syrehemmande medisinar fast.
Ver merksam
Komplikasjonar etter steinting er sjeldne. I sjeldne tilfelle kan det oppstå bløding eller hol på matrøyret eller tynntarmen. Operasjon, eller annan type behandling kan då bli nødvendig. Forskyving av stenten kan finnast, eller han kan tettast igjen av matrestar eller at svulsten eller grovev veks inn i stenten. Dette kan normalt løysast ved å leggje ein ny stent.
Om du får sterke magesmerter eller blodig oppkast etter at du har komme heim, må du kontakte sjukehuset.
Kontakt
Haugesund sjukehus
Gastromedisinsk poliklinikk
Oppmøtestad
Du finn oss i 1. etasje på Haugesund sjukehus. Gå til ventesone 7 når du har registrert deg.
Haugesund sjukehus
Karmsundgata 120, 5528 Haugesund