Blodpropp – djup venetrombose

Utgreiing startar med ei medisinsk vurdering av om det kan vere for blodpropp. Vidare utgreiing består av ein blodprøve (D-dimer), ultralyd- og røntgenundersøking av aktuelle bein eller arm. Utgreiinga skjer i akuttmottaket og tek vanlegvis nokre timar. Dersom lege mistenkjer lungeemboli utfører vi også ein CT (computerromografi).

Blodfortynnande legemiddel (koagulasjonshemmarar)

DVT blir behandla med blodfortynnande medikament (koagulasjonshemmarar). Dei kan løyse opp blodproppen og forhindre danning av ny blodpropp. Behandlinga blir gitt frå 3 månader til ubestemd tid, avhengig av årsaka og utbreiinga.

Nokre blodfortynnande medikament må du få på sjukehus, anten i form av injeksjonar eller som intravenøs behandling. Ofte kan det vere nok med ei behandling på sjukehus, der du får opplæring i korleis du kan gjere det heime. Nokon treng likevel hjelp av ein heimesjukepleiar etter utskriving.

I tillegg til blodfortynnande behandling får pasientar med DVT støttestrømpe for å redusere hevelse og seinkomplikasjonar, som posttrombotisk syndrom.

Lokal kateterbasert trombolyse

Lokal kateterbasert trombolyse er ei behandling for pasientar med djup venetrombose (DVT) i øvre del av lår og bekkenområdet. Vi legg inn eit kateter via lysken og/eller knehasen og fører det vidare inn i venen der blodproppen (tromben) sit. Vi fyller kateteret  med medikament som løyser opp blodproppane der dei er plasserte.  

Ved nokre tilfelle vurderer vi bruk av noko som heiter AngioJet. Dette er eit lite instrument som er festa på eit kateter som vi fører inn i venen der tromben er lokalisert. Den har evne til å rotere og ein oppsugingsevne som skal, i dei tilfella det er mogleg, løyse opp store trombar og suge til seg tromberestane. Langtidseffekten er usikker, då det ikkje er gjort nok forsking på dette, men vi ser at det kan vere svært effektivt og kan gjere tida du må være innlagt på sjukehuset, kortare.

I etterkant av DVT blir du følgt opp på poliklinikken ved sjukehuset eller av fastlegen. Du skal gjennom ei utgreiing for å finne underliggjande årsak til DVT, til dømes arveleg disposisjon. I sjeldne tilfelle kan også underliggjande kreftsjukdom vere ei årsak til DVT.

Dersom plagene i det aktuelle beinet eller armen aukar, skal du ta kontakt med fastlege/legevakt med ein gong.

Det kan også hende at delar av blodproppen losnar og bevegar seg til lungene. Dette blir kalla lungeemboli. Vanlege symptom på lungeemboli er smerter i brystkassa og andenød. Ved slike symptom skal du ta kontakt med sjukehuset, legevakta eller fastlegen omgåande.