Nyrepoliklinikk

Sjølv om du har nyreutfordringar, betyr ikkje det nødvendigvis at du treng dialyse. Mange klarer seg utan. Viss det er aktuelt med dialyse, vil vi vurdere kva type behandling som passar best for deg. 

Vi tilbyr nyreskole med kurs for dei med nyresjukdom, som er forventa å starte med dialyse og/eller skal ha transplantasjon. Nyreskolen blir gjennomført to gonger i året, om våren og hausten. Nokre får delta på nyreskolen før oppstart av dialyse, og nokre etterpå.  

Kursinnhald 

Kurset tar for seg emne som har stor betydning for deg som har kronisk nyresvikt. Du vil gjennom kurset få mykje viktig informasjon om din sjukdom og forskjellige behandlingsmoglegheiter. Du får også informasjon om kva mat du bør ete, og kva du eventuelt bør unngå.  

På nyreskolen får du: 

• Gjennomgang av nyrenes funksjon 
• Sjukdommar som fører til nyresvikt 
• Medikament 
• PD – heimedialyse og dialyse på sjukehus 
• Kosthald 
• Om støtteorganisasjonen LMT 
• Transplantasjon 
• Besøk av ein donor og ein som er transplantert 
• Trygderettar og fysisk aktivitet 

Matservering 

Det vil bli servert enkel lunsj med påsmurte horn og kaffe/te. Dette koster 50 kr for kvar person og kvar undervisningsdag. Pasientar som ikkje har frikort, vil i tillegg få tilsendt ein faktura på eigenandel for kurset. Pårørande betaler ikkje for kurset, men må betale for maten.  

Vi har eit eige program med transplantasjonskoordinator for dei som skal nyretransplanterast. Dersom du er ein av dei, vil du få oppfølging av lege/sjukepleiar for meir informasjon og vidare undersøkingar.  

Dei som blir tilvist til nyrepoliklinikken får tildelt legetime hos oss. Vi anbefaler at du møter opp til timen du har fått tildelt. Dersom du vel å bytte time, kan det bli lang ventetid på grunn av fulle ventelister. 

Du vil enten få time hos nyrelege eller sjukepleiar. Du vil også ha jamlege legetimar dersom du er under oppfølging av sjukepleiar.  

Hugs å ta med medisinliste til timen din.  

Du vil få tilsendt eit brev om tid, stad og kva undersøkingar du eventuelt skal ha. Brevet får du digitalt og kan lesast på helsenorge.no. Har du ikkje tilgang til nett, får du brevet i postkassen din som før.  

Dersom du skal ta blodprøve, får du informasjon om dette i innkallingsbrevet. Hugs å ta blodprøve nokre dagar før eller seinast dagen før du har time hos poliklinikken. Møt opp på laboratoriet på Haugesund sjukehus for å ta blodprøve. 

Prøvetaking og opningstider - Helse Fonna HF