Helsetenesta skal sikre pasientar med kroniske og alvorlege sjukdommar ei samanhengande og heilskapeleg helseteneste uavhengig av om tenesta blir ytt frå primærhelsetenesta eller frå sjukehusa.
Sentrale helsepolitiske føringar krev at sjukehus og primærhelsetenesta samarbeidar slik at pasientane i større grad opplev samordning, kontinuitet og fagleg god kvalitet gjennom heile pasientforløpet.
Samarbeid med kommunane
For å komme utfordringa i møte har Helse Fonna etablert eit forpliktande samarbeid med primærhelsetenesta i alle kommunar i regionen.
Dette samarbeidet omhandlar mellom anna samarbeidsavtalar, praksiskonsulentordning, ulike prosjekt, diverse møtearenaer og kontinuerleg dialog og informasjonsstraum mellom partane.
Samhandlingseininga har det overordna systemansvaret i Helse Fonna for samhandling med kommunehelsetenesta og fastlegane.